“>ရှင်အရဟံ၏လမ်းညွှန်ပြသမှုများကြောင့် သထုံမှပိဋကတ်သုံးပုံနှင့်ရဟန်းတော် များ၊မွန်ဘုရင်မနူဟာအနွယ်တော်များ စသည်တို့အားပုဂံသို့ပြည်သို့ ယူဆောင်လာပြီးနောက်တွင် ပုဂံပြည်တွင် ထေရဝါဒသာသနာတော်ကို အုတ်မြစ်ချနိုင်ခဲ့ပါသည်။ ပုဂံထေရဝါဒသာသနာ အဦးအစမှတ်တိုင်ကြီးသဖွယ် ဖြစ်လာပါသည်။ ပုဂံထေရဝါဒ သာသနာ မထွန်းကားမီ အချိန်အခါက ပျူလူမျိုးတို့၏သာသနိကအဆောက်အအုံတို့ပြိုးပြိုးပြောက်ပြောက်ရှိခဲ့သော်လည်းထေရဝါဒသာသနာပြန့်ပွားခြင်းမရှိခဲ့ပါ။ အနော်ရထာ အရင်ကျသော ဗူးဘုရားအပါအဝင် ပျူခေတ်ပျူလက်ရာ ပျူအုတ်များနှင့် တည်ထားသည့်ပုထိုးများပုဂံတွင်(၁၉)ရွာဝင် နဂါးစိုး၊ နဂါးကျစ်၊ အနုရာဓ၊ ကျောက်စကားတည်ရာ ဝန်းကျင်တစ်ဝိုက်တွင် (၄၉)ဆူခန့် တွေရသည်။ သို့သော် စစ်မှန်သော ပုဂံပြည်ထေရဝါဒသာသနာသည်အနော်ရထာမင်းလက်ထက်မှ စတင်ထွန်းကားခဲ့ပါသည်။ ထို့ကြောင့် မနူဟာဘုရားကြီးသည် သာသနာ၏အဦးအစမှတ်တိုင်ဖြစ်ခဲ့ခြင်းဖြစ်ပါသည်။
                    မွန်ဘုရင်မနူဟာသည် ပုဂံပြည်တွင် ထေရဝါဒသာသနာတော် ထွန်းကားပြန့်ပွား လိုသောဆန္ဒဖြင့် မနူဟာဘုရားကြီးကိုတည်ထားခဲ့ပါသည်။ ခေတ်အဆက်ဆက် ပြုပြင်မွမ်းမံခြင်းများနှင့်အတူမနူဟာမင်းကြီး၏ ကောင်းမှုတော်ဘုရားကြီးကို ယနေ့တိုင် ကြည်ညိုဖွယ်ဖူးမြော်နိုင်ပါသည်။ မွန်-ဗမာမင်းနှစ်ပါးတို့၏ ပေါင်းစည်းမှုလက်ရာကို ပုဂံထေရဝါဒသာသနာ၏ အဦအစနမူနာစံပြလက်ရာကို တွေ့မြင်နိုင်ပါသည်။ ပုဂံခေတ်မှ ယနေ့အချိန်ထိ မနူဟာဘုရားကြီးနှင့်ပတ်သက်၍ သမိုင်းအထောက်အထားများ၊ ယဉ် ကျေးမှု အမွေအနှစ်များ၊ ပုဂံခေတ်လူမျိုးတို့၏ လူနေမှုဓလေ့စရိုက်များ၊ ပုဂံထေရဝါဒ သာသနာမှ ယနေ့ခေတ် ထေရဝါဒသာသနာတော်အထိ အဆင့်ဆင့် ပြန့်ပွားစီးဆင်း လာပုံများကိုလေ့လာတွေ့ရှိနိုင်ပါသည်။