အလိုတော်ပြည့်ဘုရားသည် ကျန်စစ်သားမင်းကြီး တည်ထားကိုးကွယ်ခဲ့ပြီး နောင် နှစ်ပေါင်း(၁၀၀)ကျော်လာသောအခါ ရာသီဥတုဒဏ်၊ ငလျင်ဒဏ်၊ မသမာသူတို့၏ ဖျက်စီးဒဏ်အမျိုးမျိုးတို့ကြောင့် အနည်းအများဆိုသလို ပျက်စီးခဲ့လေသည်။ ထိုအပျက်အစီးတို့ကို နောင်သောအခါ အစဉ်သဖြင့် တည်တံ့ခိုင်မြဲစေရန် သင်ကြီးငါတုတ်သင် အမည်ရှိ ရဟန်းတော် တစ်ပါး ပြုပြင်ခဲ့လေသည်။ ထိုသင်ကြီးငါတုတ်သင်အမည်ရှိ ရဟန်းတော်တစ်ပါး ပြုပြင်ခဲ့သော အထောက်အထားကို အလိုတော်ပြည့်ဘုရား၏ ဂန္ဓကုဋီတိုက်အဝင် ဘယ်ဘက်နံရံ၌ မင်စာဖြင့် ရေးထိုးထားသော စာကြောင်း(၁၆)ကြောင်းအရ အခိုင်အမာ သိရှိရသည်။ ထိုမင်စာဖြင့်ရေးထိုး ထားသော စာကြောင်း(၁၆)ကြောင်းမှာ –
          “သင်ကြီး(ဘုန်းကြီး) ငါတုတ်သင်က အာလိုဝ်ပြည့်မည်သော ဂူဘုရားနှင့် စဉ့်ပုထိုးတော် အား ကောဇာသက္ကရာဇ် (၅၅၆) ခုနှစ်၊ နယုန်လဆန်း(၁၁)ရက်နေ့တွင် ပြုပြင်ပြီးစီးပါကြောင်း” ဟူ၍ ဖြစ်ပါသည်။၁၃၄၉ ခုနှစ်၊ တပေါင်းလပြည့်နေ့တွင် ဆရာတော်သည် ဟောင်းနွမ်းပြိုပျက်နေသော အလိုတော်ပြည့်ဘုရားလိုဏ်ဂူတော်အတွင်းသို့ မေတ္တာပို့ခြင်း၊ အဓိဌာန်ပုတီးစိတ်ခြင်း၊ တရား ဘာဝနာရှုမှတ်ပွားများခြင်းတို့ကို စတင်ပြုလုပ် အားထုတ်ခဲ့သည်။ ထိုသို့အားထုတ်စဉ် ဆရာတော် ၏ အိမ်မက်ထဲ၌ ဝတ်ဖြူစင်ကြယ်ဝတ် သူတော်စင်တစ်ဦးသည် အလိုတော်ပြည့်ဘုရားအား သာသနာပြုရန် သုံးကြိမ်ဆက်တိုက် လာရောက်တိုက်တွန်း လျှောက်သွားသည်ဟုဆို၏။ထိုအိမ်မက်အရ ဆရာတော်သည် သတ္တဝါများ၏ အကျိုးကိုမျှော်ကိုးပြီး ကိုယ်တိုင်ဦးစီး ကမ္မကထပြုလုပ်ကာ ၁၃၅၄-ခုနှစ် နတ်တော်လပြည့်နေ့ ဗုဒ္ဓပူဇနိယပွဲတော်ကို စည်ကား သိုက်မြိုက်စွာ ကျင်းပပူဇော်ခဲ့ပါသည်။
           ထိုသို့ ဗုဒ္ဓပူဇနိယပွဲတော်ကျင်းပနေစဉ် ဖူးမြင်ရသူ လူထုပရိသတ်အပေါင်း အံ့ဩရ လောက်အောင် လိုဏ်ဂူတော်တစ်ခုလုံး အရောင်အဆင်းအမျိုးမျိုးတို့ဖြင့် အထက်သို့ လျှံတက်၍ ဓါတ်တော်ကွန့်မြူးတော်မူပါသည်။ ဘုရားဖူးလာကြသော သူတော်စဉ်တို့မှာ လည်း ဓါတ်တော်များကွန့်မြူးပုံကို ဖူးမြင်ကြရ၍ ဖူးမဝနိုင်အောင် သဒ္ဓါပီတိစိတ်များ တဖွားဖွားဖြစ်ပေါ်ပြီး ကြည်ညိုမဆုံးဖြစ်ကြရပါသည်။