တုရင်တောင်ပေါ်တွင်  ရှေးကာလကတည်းက သဘာဝကျောက်သားနံရံကို ဖောက်ထွင်းထားသော တရားထိုင်သော ဂူများ၊ သိမ်ဟောင်း၊ ကျောင်းဟောင်းနှင့် အာရုံခံတန်ဆောင်းဟောင်းများကို တွေ့ရပါသည်။
တုရင်တောင်စွယ်တော်မြတ်စေတီတော်ကြီး၏ အောက်ခြေပစ္စယံမှာ ရှစ်ဒေါင့်ပုံ ရှစ်မျက်နှာရှိပြီး တစ်မျက်နှာလျှင် ဖောင်းကြွဆင်လေးစီးဖြင့် ဆင်အစီးပေါင်း ၃၂ စီးခံ၍ တည်ထားပါသည်။ ပစ္စယံနှင့် ခေါင်းလောင်းပုံစေတီတော်ကြားတွင် ကြာပန်းခံထားသည်။ ခေါင်းလောင်းပေါ်တွင် ပန်း ၁၆ပွင့် စီထားသော ရင်ဖွဲ့ခါးပတ်၊ ဘီလူးပန်းဆွဲ  ၂၀ရုပ်၊ စိန်တောင်၊ ပတ်ကြီး၊ ပတ်သေး၊ မိုးလျောတို့နှင့် ဖောင်းရစ် ၄ ရပ်ရှိ သည်။ အောက်ခြေဖိနပ်တော်မှ အထွတ်ထိ ဉာဏ်တော် ၇၅ ပေ ၉ လက်မ မြင့်သည်။ စေတီတော်၏ ထူးခြားချက်မှာ ရင်ပြင်တော်ပေါ်တွင် အဆောက်အဦမရှိ၍ ပိုမိုထင်ရှားပေါ်လွင်စေခြင်း ဖြစ်ပါသည်။ အာရုံခံ အဆောက်အဦများကို ရင်ပြင်တော်အောက်ဘက် အနိမ့်ပိုင်းတွင် တွေ့ရပါသည်။