စေတီတော်ကြီး၏ဒါယကာ အနော်ရထာမင်းကြီး နတ်ရွာစံပြီးနောက် ပုဂံမင်းအဆက်ဆက် တို့နှင့်တကွ စစ်ကိုင်း၊ ပင်းယ၊ အင်းဝ၊ ကုန်းဘောင် မင်းအဆက်ဆက်တို့ စောင့်ထိန်းပြုပြင် ကိုးကွယ် ခဲ့ပါသည်။
တတိယအင်္ဂလိပ် မြန်မာ စစ်ပွဲကာလနှင့် မြန်မာနိုင်ငံကို ဗြိတိသျှအစိုးရတို့ သိမ်းယူပြီး ၁၂၄၇ ခုနှစ် နောက်ပိုင်းတွင် တိုင်းပြည်နှင့်အဝှမ်း မတည်မငြိမ်ဖြစ်ခဲ့ကြရသည်။ စေတီတော်ကြီးအား ပြုပြင် စောင့်ရှောက်မှု အားနည်းခဲ့ပါသည်။ အင်္ဂလိပ်နယ်ချဲ့လက်ထက် သာသနာသက္ကရာဇ် ၂၄၅၆ခု၊ ကောဇာ သက္ကရာဇ် ၁၂၇၄ခုနှစ်တွင်မှသာ ပထမတောင်ပေါ်ကျောင်းဆရာတော် ဦးအာလောက၏ စီမံဦးဆောင်မှု ဖြင့် ညောင်ဦးမြို့ဈေးရပ် ဦးမှုံ၊ ဒေါ်သာယာတို့မိသားစုမှ စေတီတော်ပြုပြင်ခြင်း၊ ကျောင်းကန်ဇရပ်နှင့် သိမ်များ ပြုပြင်လှူဒါန်းခြင်းတို့ကို တွေ့ရပါသည်။
တုရင်တောင်စေတီတော်ကြီး၏ ထီးတော်ကို အသစ်ပြန်လည်ကပ်လှူနိုင်ရန်အတွက် ပထမတောင်ပေါ် ဆရာတော်ဦးအာလောကသည် ထီးတော်သစ်ပြုလုပ်တင်လှူရန် ချောက်ကန် ရွာဦးကျောင်းဆရာတော် ဦးစန္ဒိမာအား တာဝန်ပေးအပ်ခဲ့ပြီး ဦးစန္ဒိမာက ဦးဆောင်၍  ပန်းချီ၊ ပန်းပု၊ ပန်းဘဲ၊ ပန်းတိမ် စသောပညာများကို တတ်မြောက်သော ချောက်ကန်ရွာသူ၊ ရွာသားတို့ကို နှိုးဆော်တိုက်တွန်းပြီး          ဘုံ(၁၅)ဆင့်ရှိသော ထီးတော်ကို  ၁၂၆၃ ခုနှစ်၌ တင်လှူပူဇော်နိုင်ခဲ့ပါသည်။ ယခုလက်ရှိ တုရင်တောင် စွယ်တော်မြတ်စေတီတော်ကြီး၏ ထီးတော်ကို ၁၉၉၁ ခုနှစ်၊ ဖေဖော်ဝါရီလ (၂၇) ရက်၊၁၃၅၂ ခု၊ တပေါင်းလပြည့်နေ့တွင် ကုသိုလ်ရှင်ဒုတိယဗိုလ်ချုပ်ကြီး ထွန်းကြည်နှင့်ဇနီးဒေါ်နီနီတို့မှ ကုသိုလ်ပြု တင်လှူထားပါသည်။