မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်၊ သင်တောင်းကြီးရွာရှိ ဆုတောင်းပြည့်အဓိဋ္ဌာန်အောင် မဟာရွှေသိမ်တော်မြတ်စွာဘုရားကြီးသည် သက္ကရာဇ် (၃၉၅)ခုနှစ်တွင် အနော်ရထာမင်းမြတ် တည်ထားကိုးကွယ်၍ ရှင်အရဟံရဟန္တာကိုယ်တော်တိုင် စေတီတော်ကြီး၊ ရုပ်ပွားတော်နှင့် သိမ်တိုက်တော်တို့အားတွဲလျက် သိမ်သမုတ်တော်မူခဲ့ရာ အနော်ရထာမင်းကြီးတည်ထား ခဲ့သော စေတီတော်ကြီး၏ ဉာဏ်တော်အမြင့်သည် (၉)တောင်သာလျှင်ရှိပြီး ၁၃၀၉ ခုနှစ်တွင် ရွာသူ/ ရွာသားများကောင်းမှုဖြင့် မူလစေတီငုံ၍ (၁၅)တောင်မြှင့်ပြီး ဒုတိယအကြိမ်လုံးပတ်တော်ဖွင့် ဉာဏ်တော် မြှင့်ကိုးကွယ်ပူဇော်ခဲ့ရာ ၁၃၅၆ ခုနှစ်မှ သင်တောင်းရွာသူ/ရွာသားများနှင့် ကျောက်ဆည် နယ်သူ/ သားများ ကောင်းမှုဖြင့် (၁၅) တောင်ကိုငုံကာ ဉာဏ်တော်(၃၄)တောင်အမြင့်သို့ ထပ်မံမြှင့်၍ ပူဇော်ခဲ့ကြပါသည်။

အရှေ့ဘက်သို့ မျက်နှာမူ၍ မုခ်တစ်ခုတည်းသာရှိတဲ့စေတီတော်ဖြစ်ပြီး မုခ်ထဲတွင် ဆုတောင်းပြည့် ရွှေသိမ်တော်မြတ်စွာဘုရား ကိန်းဝပ်တော်မူသော တန်ခိုးကြီးဘုရားတစ်ဆူဖြစ်ပါသည်။ ရွှေသိမ်တော် ရုပ်ပွားတော်၏ ဉာဏ်တော်အမြင့်မှာ (၃)ပေ(၂)လက်မရှိပြီး သိမ်တိုက်တော်၏ အကျယ်အဝန်းမှာ အရှေ့အနောက် (၄၃) ပေ ၊ တောင်မြောက်(၃၆) ပေရှိပါသည်။ မဟာရွှေသိမ်တော်မြတ်စွာဘုရားသည် ကျောက်ဆည်မြို့မြောက်ဘက်(၂)မိုင်အကွာ ရန်ကုန်၊ မန္တလေး ကားလမ်းအရှေ့ဘက်တွင်တည်ရှိပါသည်။

၁၂၈၂ ခုနှစ်တွင် ရွာသူ/သားများ မိုးပေါ်ကျရောဂါဖြင့် သေကြေပျက်စီးမှုများဖြစ်ပေါ်လာခဲ့ပါသည်။ ထိုအခါရွာသူကြီးအား အိမ်မက်ပေးခဲ့ရာ သင်တောင်းကြီးရွာ၏ အနောက်ဘက်တွင် အနော်ရထာမင်းမြတ် တည်ထားပြီး ရှင်အရဟံရဟန္တာကိုယ်တော်တိုင် သိမ်သမုတ်တော်မူခဲ့သည့် ရွှေသိမ်တော်မြတ်စွာဘုရား ဘွဲ့တော်ဖြင့် ဘုရားတစ်ဆူရှိသည်ဟု အိမ်မက်ပေးခဲ့ပါသည်။ ထိုဘုရားအား မွမ်းမံပြင်ဆင်၍ ဆွမ်းတော်ကြီး ကပ်ပွဲများပြုလုပ်လှူဒါန်းကြလျှင် အန္တရာယ်ကင်းပြီးစီးပွားဥစ္စာများတိုးတက်လာလိမ့်မည်ဟု ရွာသူကြီးအား အိမ်မက်ပေးသောကြောင့် ၎င်းအိမ်မက်အတိုင်း ရွာသူ/သားများ လိုက်လံရှာဖွေသောအခါ မွန်းနံခြုံများဖြင့် ဖုံးအုပ်နေ၍ ရှင်းလင်းကြရာ စေတီတော်ရုပ်ပွားတော်နှင့် သိမ်ပန္နပ်များတွေ့ရှိကြပါသည်။

ထိုအခါ ရွာသူကြီးမှ ရွာသူ/သားများနှင့် တိုင်ပင်ညှိနှိုင်းကြရာ ဘုရားအား ပြန်လည်မွမ်းမံပြင်ဆင်ပြီး ဆွမ်းတော်ကြီးကပ်ပွဲများ ပြုလုပ်လှူဒါန်းရန် တိုင်ပင်ညှိနှိုင်းကြပြီး ၁၂၈၂ ခုနှစ်၊ တန်ဆောင်မုန်းလဆန်း (၁၀)ရက် (၁၁)ရက်နေ့တွင် ဆွမ်းတော်ကြီးကပ်လှူပွဲနှင့် ဗုဒ္ဓပူဇနိယပွဲတော်ကြီးကျင်းပပြုလုပ်ခဲ့ကြပါသည်။

          တပို့တွဲလပြည့်နေ့တွင် နှမ်းမနဲကပ်လှူပွဲများကျင်းပခြင်း၊

          ကဆုန်လပြည့်နေ့တွင် ညောင်ရေသွန်းလောင်းခြင်းနှင့် ဆွမ်းကြီးလောင်းလှူပွဲကျင်းပခြင်း၊

          ဝါဆိုလပြည့်နေ့တွင် ဝါဆိုသင်္ကန်းကပ်လှူခြင်းနှင့် ဝါဆိုပန်းကပ်လှူပွဲများ နှစ်စဉ်ကျင်းပပြုလုပ် လှူဒါန်းလျက်ရှိကြသည်မှာ ယခုနှစ်တိုင်ထိပြုလုပ်ကြပါသည်။ ဘုရားကြီးအား မွမ်းမံပြင်ဆင်ဆွမ်းတော်ကြီး ကပ်ပွဲများ ကျင်းပပြုလုပ်ပြီးသည့်နှစ်မှစ၍ သင်တောင်းကြီးရွာသူ/သားများ သည် အန္တရာယ်ကင်းပြီး စီးပွားဥစ္စာများတိုးတက်ကြ၍ နှစ်စဉ်နှစ်တိုင်းလှူဒါန်းလျက်ရှိကြပါသည်။