အောင်မြေ

          အောင်မြေကို ၁၃၆၃ ခု၊ ကဆုန်လပြည့်၊ တနင်္ဂနွေနေ့တွင် ပန္နက်တင်၍ ၁၃၆၄ ခု၊ ကဆုန်လပြည့်၊ တနင်္ဂနွေနေ့တွင် ထီးတော်တင်လှူအောင်မြင်ပါသည်။ ရွှေသိမ်တော်ဘုရားဩဝါဒါစရိယဆရာတော်ကြီး များက ပရိတ်တော်များ၊ အောင်ဂါထာနှင့် ပထဝီဇယမန္တာန်တော်များ ရွတ်ဖတ်ပူဇော်ကြပါသည်။ ဩဝါဒါ စရိယဆရာတော်ကြီးများထဲမှ သက်တော်အကြီးဆုံးဆရာတော်ကြီးက ရွှေသိမ်တော်ဘုရား၏ အရှေ့မြောက် ဒေါင့်မှ (၁၀၈)လှမ်း လှမ်းကာ (၁၀၈)လှမ်းမြောက်တွင် အောင်မြေသတ်မှတ်ပူဇော်ကြပါသည်။ အောင် အမည်ပါသော (၇)ရက်သားများက အရပ်မျက်နှာအလိုက်နေရာယူ၍ အောင်မြေများထည့်ကြပါသည်။

၁။      ပထဝီဓာတ်အဖြစ်ရွှေဘိုအောင်မြေ၊ ကန်တလူအောင်မြေ

၂။       တေဇောဓာတ်အဖြစ် ပုပ္ပါးတောင်ကလပ်မှ မီးသင်းကျောက်

၃။      အာပေါဓာတ်အဖြစ် မော်လမြိုင်ခေါင်းဆေးကျွန်းမှရေ

၄။      ဝါယောဓာတ်အဖြစ် မြန်မာနိုင်ငံအမြင့်ဆုံးတောင်ထိပ်မှ လေသိုက်တို့ကိုယူကာ အောင်မြေအဖြစ် ထည့်ကြပါသည်။

          အပေါ်စေတီဋ္ဌာပနာတိုက်တွင် ရွှေတိဂုံမှမြေ၊ ဘုရားရှင်သက်တော်ထင်ရှားရှိစဉ်က ရေသုံးသပ်တော် မူသော ဇေတဝန်ကျောင်းမှရေ၊ မာန်နတ်မင်းအောင်မြင်ရာ ဗောဓိပင်နှင့် ရွှေပလ္လင်တော်တည်ရာ အရပ်မှမြေ၊ ဓမ္မစင်္ကြာတရားဦးဟောတော်မူရာ အရပ်မှမြေတို့ကို ရတနာများနှင့်အတူ ထည့်သွင်း    ပူဇော်ထားကြပါသည်။ အောင်မြေစေတီတော်အား ကျောက်ဆည်မြို့၊ စုကြီးရပ်နေ ဦးတင်ထွန်း+ ဒေါ်ကြည်သန်း(မိသားစု)မှလှူဒါန်းပူဇော်ခဲ့ပါသည်။