ထေရဝါဒဗုဒ္ဓဘာသာကို သက်ဝင်ယုံကြည်သော နိုင်ငံများမှာ သီရိလင်္ကာ၊ မြန်မာ၊ ထိုင်း ၊ ကမ္ဘော ဒီးယားနှင့် လာအို(၅)နိုင်ငံတို့ ဖြစ်ပါသည်။ မြန်မာနိုင်ငံသည် ထေရဝါဒဗုဒ္ဓဘာသာကိုဘုရားရှင် လက်ထက် ကပင် လက်ခံကျင့်သုံးခဲ့သည်ဟုဆိုကြပါသည်။
မြတ်စွာဘုရားရှင် ပရိနိဗ္ဗာန်ပြုပြီး မဟာသက္ကရာဇ် ၁၄၈ခု၊ သာသနာသက္ကရာဇ် ၁၊ ရာဇဂြိုလ်ပြည် အဇာတသတ်မင်းလက်ထက်တွင် ဝေဘာရတောင်ခြေ သတ္တာပဏ္ဏိလိုဏ်ဂူ (ယခု Rag Gir အရပ်)၌ ပထမ သင်္ဂါယနာတင်ပွဲ၊ သာသနာသက္ကရာဇ် (၁၀၀)၊ မာဂဓတိုင်း ကာလာသောကမင်းလက်ထက်တွင် ဝေသာလီပြည် ဝါဠုကာရာမကျောင်းတော်၌ ဒုတိယသင်္ဂါယနာတင်ပွဲ၊ သာသနာသက္ကရာဇ် (၂၀၂)၊ အာသောကမင်း (သီရိဓမ္မာသောကမင်း) လက်ထက်တွင် ပါဋလိပုတ်ပြည် အာသောကရာမကျောင်း၌ တတိယသင်္ဂါယနာ တင်ပွဲ၊ သာသနာသက္ကရာဇ် (၄၄၀)၊ ဝဋ္ဋဂါမဏိအဘယမင်းလက်ထက်တွင် သီဟိုဠ်ကျွန်း မတလေ (Matale) ဒေသရှိ အလောကဂူ၌ စတုတ္ထသင်္ဂါယနာတင်ပွဲ ကျင်းပခဲ့ပါသည်။ စတုတ္ထသင်္ဂါယနာတင်ပွဲမှ စပြီး ပိဋကတ် သုံးပုံ နှင့် အဋ္ဌကထာကျမ်းများကို ပေထက်အက္ခရာ တင်တော်မူခဲ့ပါသည်။ 
          မြန်မာနိုင်ငံတွင်လည်းသင်္ဂါယနာတင်ပွဲ နှစ်ကြိမ်ကျင်းပခဲ့ပါသည်။ သာသနာသက္ကရာဇ် ၂၄၁၄ (အေဒီ၁၈၇၁) မင်းတုန်းမင်းကြီးလက်ထက် မန္တလေးမြို့တွင် ပဉ္စမသင်္ဂါယနာတင်ပွဲကျင်းပခဲ့ပါသည်။ ဆဋ္ဌသင်္ဂါယနာတင်ပွဲကို သာသနာသက္ကရာဇ် ၂၄၄၈ (အေဒီ၁၉၅၄)ခုနှစ်တွင် နိုင်ငံတော်ဝန်ကြီးချုပ် ဦးနု လက်ထက် ရန်ကုန်မြို့ ကမ္ဘာအေးကုန်းမြေ မဟာပါသဏလိုဏ်ဂူတော်၌ စတင်ကျင်းပပြီး သာသနာသက္ကရာဇ် ၂၅၀၀ပြည့်နှစ် (အေဒီ၁၉၅၆)ခုနှစ်တွင် ပြီးစီးခဲ့ပါသည်။ ထိန်းသိမ်းအပ်သော ဘုရားစကားတော် အယူစကား အစဉ်၊ မထေရ်အဆက်ဆက်တို့က မူရင်းမပျက် သင်္ဂါယနာတင်လျက် ထိန်းသိမ်းစောင့်ရှောက်ထားအပ်သော ဘုရားစကားပါဠိတော်အတိုင်း ကျင့်ကြံနေထိုင်သော အယူဝါဒကို ထေရဝါဒဟုခေါ်ဆိုပါသည်။ လက်ရှိ တွင်လည်း နိုင်ငံတော်စီမံအုပ်ချုပ်ရေးကောင်စီအနေဖြင့် နိုင်ငံတော်သံဃမဟာနာယက ဆရာတော်ကြီး များ၏ ဩဝါဒများနှင့်အညီ ဗုဒ္ဓသာသနာတော်မြတ်ကြီး ထွန်းလင်းဝေစည်အောင် စဉ်ဆက်မပြတ် ထောက်ပံ့ ပူ‌ဇော်နိုင်ရန် အားစိုက်ကြိုးပမ်းဆောင်ရွက်လျက်ရှိရာ ထူးခြားမွန်မြတ်သော ဗုဒ္ဓပူဇာကုသိုလ်တော် အဖြစ် ဆဋ္ဌသင်္ဂါယနာမူ ပိဋကတ်သုံးပုံ ပါဠိတော်(မြန်မာ၊ ရိုမန်) အက္ခရာနှစ်မျိုးဖြင့် ပြုစုထားသောကျမ်းစာအုပ် များကို ပြည်တွင်း၊ ပြည်ပရှိ သာသနာ့တက္ကသိုလ်ကြီးများ နှင့် ဘုန်းတော်ကြီးကျောင်းများသို့ လှူဒါန်းလျက် သာသနာတော်ထွန်းကားပြန့်ပွားအောင် ဆောင်ရွက်လျက်ရှိခဲ့ပါသည်။ နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီ လက်ထက်တွင် နိုင်ငံတော်အကြီးအကဲ ဗိုလ်ချုပ်မှူးကြီးသန်းရွှေ ဦးဆောင်၍ မန္တလေးနှင့် ရန်ကုန်တွင် စွယ်တော်ြမတ်စေတီနှစ်ဆူ၊ ရန်ကုန်မင်းဓမ္မ ကုန်းတော်အပေါ်တွင် လောကချမ်းသာ အဘယ လာဘမုနိရုပ်ပွားတော်မြတ်၊ နေပြည်တော်တွင် ဥပ္ပါတသန္တိ စေတီတော် တို့ကိုလည်းကောင်း၊ နိုင်ငံတော် စီမံအုပ်ချုပ်ရေး ကောင်စီလက်ထက်တွင် နိုင်ငံတော်အကြီးအကဲ ဗိုလ်ချုပ်မှူးကြီးမင်းအောင်လှိုင်ဦး‌ဆောင်၍ စကျင်ကျောက်ဖြင့်ထုဆစ်သော ကမ္ဘာပေါ်ရှိထိုင်တော်မူ ကျောက်ဆစ်ရုပ်ပွားတော်များအနက် ဉာဏ်တော် အမြင့်ဆုံးဖြစ်သည့် မာရဝိဇယဗုဒ္ဓရုပ်ပွားတော်မြတ်ကြီးကိုလည်း တည်ထားကိုးကွယ်ခဲ့ကြပါသည်။
          နိုင်ငံတော်အကြီးအကဲများ၏ စေတနာ၊ သဒ္ဓါတရားပြည့်ဝစွာ နှင့် ဦးဆောင်လမ်းညွှန်မှုအောက်တွင် ပြည်သူတစ်ရပ်လုံး လက်တွဲညီညီ ဆောင်ရွက်နိုင်မှုကြောင့် ထေရဝါဒ ဗုဒ္ဓဘာသာဝင် (၅)နိုင်ငံတွင် မြန်မာ နိုင်ငံသည် ပရိယတ္တိ၊ ပဋိပတ္တိ၊ ပဋိဝေဒတည်းဟူသော သာသနာသုံးရပ်လုံးတွင် စံပြရှေ့ဆောင် နိုင်ငံတစ်ခု အဖြစ်ဝင့်ထည်စွာ ရပ်တည်နိုင်ခဲ့ကြပါသည်။