ဗျိုင်း ၊ ဖား ၊ ဖွတ်တို့ တိတ်သုံးတန်ကြို့ရသည် မြို့ရွှေပေါက္ကံပုဂံပြည့်ရှင် ဆင်ဖြူများရှင် အနော်ရထာမင်းကြီး၏ မြေးတော် ၊ ဘုန်းတော် အလွန်တရားကြီး မြတ်တော်မူ သောစကြာ ရတနာရှင်ဆင်ဖြူများရှင်အလောင်းစည်သူမင်းကြီး၏ သားတော်ကြီးဖြစ်တော်မူသော “မင်းရှင်စော” သည် သာသနာတော် (၁၆၀၀) ကျော် ၊ သက္ကရာဇ် (၅၀၀) ကျော်တွင် တိုင်းနိုင်ငံ လှည့်လည်တော်မူ သည်တွင် အလွန်လှပထူးဆန်းသော(ရွှေအဆင်းရှိသော)ရွှေကျီးတစ်ခုနား၍နေသည်ကို မြင်သော အကြောင်းအသို့နည်းဟု မင်းချင်း ယောက်ျား ပညာရှိများအား မေးမြန်းတော်မူရာ “ အရှင်ဘုရား၏ ဘုန်းကံပါရမီကြောင့်ရွှေကျီးနားသော ဌာန၌ဘုရားတည်ထားကိုးကွယ်တော်မူရန် သာသနာတော် စောင့်နတ်များ၏ နှိုးဆောင်ချက် ဖြစ်ပါကြောင်း ”မင်းချင်းယောက်ျားများ၏ လျှောက်တင်ချက်အရ စေတီတော်တည်ထား၍ ဓာတ်တော်မွေတော်များကိုဌာပနာတော်မူလေသည်။ (အထက်ပါသမိုင်း အကျဉ်း အရမူ-ယနေ့ ၁၃၇၈-ခုတွင်ရွှေကျီးမြင်စေတီတော်မြတ်ကြီး၏သက်တမ်းသည် ၈၇၈ နှစ်ခန့် ရှိနိုင်ကြောင်း)
           စေတီတော်တည်ရာဌာနတွင်ရွှေကျီးနားသည်ကိုမြင်တော်မူသောကြောင့်“ရွှေကျီးမြင်မြတ်စွာဘုရား” ဟု ဘွဲ့တော် သမုတ်တော်မူလေသည်။ရွှေကျီးမြင်မြတ်စွာဘုရား လိုဏ်ဂူတော်အတွင်း ၊ ဆုတောင်းပြည့်ဘုရား ရုပ်ပွားတော်တစ်ဆူကိုလည်း ဓာတ်တော် မွေတော်များ ဌာပနာ၍ တည်ထား ကိုးကွယ်တော်မူခဲ့လေသည်။
           မင်းရှင်စော တည်ထားကိုးကွယ်တော်မူခဲ့သော ရွှေကျီးမြင်ဆုတောင်းပြည့်မြတ်စွာဘုရား လိုဏ်ဂူတော်အတွင်းဝယ် ဘုန်းတန်းခိုးအာနုဘော် အလွန်တရား ကြီးမြတ်တော်မူ သော မင်းရှင်စော ၏ခမည်းတော် အလောင်းစည်သူမင်းကြီးအား တာ၀တိံသာနတ်ပြည်ကို စိုးပိုင်တော်မူသော သိကြားမင်းဆက်သသည့် ဆံတော် ဓာတ်တော် မွေတော်များ ထည့်သွင်း ပူဇော်ထားသော တန်ခိုး ကြီးဆုတောင်းပြည့်ဘုရားများ ကိန်းဝပ်စံပါယ်တော်မူလေသည်။
           အလောင်းစည်သူမင်းကြီးကားမိဖုရားလေးပါးတည်း။ ရတနာပုံမိဖုရား ၊ တိလောကစန္ဒာ ၊ ရာဇကုမ္မာရီ ၊ တောင်ပြင် မိဖုရားတို့ ဖြစ်လေ၏။ရတနာပုံမိဖုရားမှ မင်းရှင်စောအား ဖွားမြင် တော်မူ၏။
           သားတော်မင်းရှင်စောသည်မင်းကြီးအားညီနောင်များနှင့်အခစားဝင်ရာတွင်မကြည်လင်သော အမြင်တို့ဖြင့်မင်းကြီးအားမခစားဘဲမျက်နှာလွှဲ၍အတန်ငယ်နေပြီးသော် ကိုယ်မကျန်း မအီရှိသည် ဟူ၍ ထွက်သွားလေ၏။
           အလောင်းစည်သူမင်းကြီး အထိန်းတော်သား အနန္တသူရိယကို မင်းကြီးသနားတော်မူ၍ မင်းညီမင်းသားတို့ ဝတ်ထိုက်သာ ဒုယင် ၊ အခြေတက်သော ဝတ်လုံကို ပေးတော်မူ၏။ ထိုဝတ်လုံ နှင့်အနန္တသူရိယအား သားတော်မင်းရှင်စောမြင်လေသော် “ဤကား မင်းထိန်း ၊ မင်းယတို့ ဝတ်ထိုက် သော အဝတ်မဟုတ် ။ မင်းညီမင်းသားတို့သာ ဝတ်ထိုက်သော အဝတ်သာဖြစ်၍ ဒုယင် တတ်သော ဝတ်လုံကို ချွတ်၍လဲစေ၏။ထိုအကြောင်းကို မင်းကြီး ကြားတော် မူသော်” ငါပေးတော်မူ၍ ဝတ်သည်ကို ငါမသေခင်က ဤသို့ကျင့်သည် ၊ ငါမရှိ၍ မင်းဖြစ်က ငါ့သားတော် ၊ ငါ့သမီးတော် မှူးတော် ၊ မယ်တော်တို့ကို ညှဉ်းပန်းနှိပ်စက်လတ္တံ” ဟု စားကျေးစားလက်နှင့်တကွ အခြွေအရံ ဥစ္စာရွှေ ၊ ငွေတို့ကို ရုတ်သိမ်းတော်မူ၍ နှောင်အိမ် သို့သွင်းလေ၏။ရတနာပုံမိဖုရားသည် မှူးကြီး မတ်ကြီးတို့နှင့် မင်းကြီးအား သနားတော်မူရန် လျှောက်ဖန်များလတ်သော မင်းကြီးလည်း သနားတော်မူပြန်၍ ဆင် ၊ မြင်းဥစ္စာတို့ကို ပေး တော်မူပြီးသော်“ငါ့ကို မျက်နှာသုန်၍ သွားဖူးလေပြီ ဖြစ်သောကြောင့် ငါ့နန်းတော်တွင် မနေ နှင့်”ဟု နှင်ထုတ်တော်မူလေ၏။
           သားတော်မင်းရှင်စောလည်း အလုံးအရင်း ဆင် ၊ မြင်းဗိုလ်ပါနှင့်တကွ အရှေ့ဘက် ထွန်တုံး ပူတက်တွင် ရွာပြုပြီး တည်ထောင်နေလေ၏။ထိုအရပ်၌ အနံ ၊ အလျား အတာ သုံးထောင်ရှိသော အောင်ပင်လယ်ကန်ကိုလည်း ဆယ်၏။တမုတ်ဆိုးအရပ်၌ အနံ ၊ အလျား အတာသုံးထောင်ရှိသော အောင်ပင်လယ်ကန်ကိုလည်း ဆယ်၏။တမုတ်ဆိုးအရပ်၌ ကန်ကို လည်းဆယ်၏။မြောင်းသုံးသွယ် လယ်ပတ်သုံးသောင်းဖြစ်စေ၏။တစ်နှစ်သုံးသီးစာရ၏။ အလွန်၀ပြောစည်ပင်စွာ ဖြစ်လေ၏။ ထိုသို့ စီရင်သောကြောင့် ကျီကြဘဏ္ဍာရွှေ ၊ ငွေဥစ္စာ စပါး ပေါများ၏။ဆင်လုံး ၊ မြင်းရင်း အခြွေအရံလည်း များ၏။ပါဠိအဌကတ၏ထာ ဋီကာ ကျန်တော် မူသော အရိယာသံဃာတော်တို့ကို ပင့်၍ ကျမ်းဂန် များစွာ ပြုပြီးလျှင်ပို့သင်ကြားရ၏။ပစ္စည်းလေးပါးထောက်ပံ့တော်မူ၍သာသနာတော်ကို ထွန်းလင်း စေ၏။

“ရှေးမြန်မာမင်းမြတ်တို့ ကိုးကွယ်တော်မူခဲ့သော”
“နန်းစဉ် ဆုတောင်းပြည့်ဆင်းတုတော်များအား”
“ရွှေကျီးမြင်မြတ်စွာဘုရားသို့ ပင့်ဆောင်ပူဇော်ခြင်း”
           ဗုဒ္ဓမြတ်စွာ သာသနာပြု ၊ တိုင်းပြုပြည်ပြု ၊ ဘုန်းရှင်ကံရှင် ၊ မြန်မာဘုရင် ဧကရာဇ်မင်းမြတ် တို့ ထီးစဉ်နန်းဆက် မင်းအဆက်ဆက် ကိုးကွယ်တော်မူခဲ့ကြသော တန်ခိုးကြီး ဆုတောင်းပြည့် မြတ်စွာဘုရား ဆင်းတုတော်များနှင့် ဗုဒ္ဓအံတော်မြတ်တို့ကို အခြားသူတို့ ပင့်ဆောင်ခြင်းငှာမစွမ်း ၊ ရွှေနန်းတောင်းဦးတွင် တန်းခိုးတော်အားဖြင့် ကြွင်းကျန်ရှိတော်မူသော ရုပ်ပွားဆင်းတုတော်များ နှင့်ဗုဒ္ဓအံတော်မြတ်တို့ကို(သာသနာ ပစ္ပတ္တိကဗာဟီရက) ဖြစ်သောလူဆိုး ၊ လူသွမ်းတို့၏ ဖျက်ဆီး ခြင်းအန္တရာယ်များကို သာသနာတော်စောင့် နတ်မင်းများမှ ကာကွယ်စောင့်ရှောက်လျက် သာသနာ တော် (၅၀၀၀)တိုင်အောင် တည်ထွန်းပါစေခြင်းအကျိုးငှာ သီတင်းသုံးတော်မူရင်း ရတနာပုံ ရွှေနန်းတော်ဦးမှ မန္တလေးမြို့ အနောက်ပြင် ပြည်ကြီးကျက်သရေအရပ်ရှိ “အလောင်းစည်သူ မင်းတြားကြီးဘုရား”၏ သားတော် “မင်းရှင်စော” တည်ထားကိုးကွယ်တော်မူခဲ့သော (ရွှေကျီးမြင်မြတ်စွာဘုရား) ဂန္ဓကုဋိလိုဏ်ဂူတော် အတွင်းသို့-
           ၁၂၅၁ ခုနှစ် ၊ ဝါဆိုလဆန်း(၄)ရက်နေ့တွင် မာလာလက်ာရ ဓမ္မသေနာပတိ ၊ အတုလဓိပတိ သီရိပဝရ မဟာရာဇာ ဓိရာဇဂုရု(တောင်တော်သာသနာပိုင်ဆရာတော်) အမှူးရှိသော တံဆိပ်တော်ရ ဆရာတော်ဘုရားကြီးများနှင့်တကွ ဆွေတော်မျိုးတော်များ ၊ (အဂ္ဂမဟာသေနာပတိဝန်ရှင်တော် ကင်းဝန်မင်းကြီး ၊ သတိုးမင်း ၊ မဟာမင်းလှစည်သူကျော်) စသော မှူးတော်မတ်တော် ပြည်သူ အပေါင်းတို့ အညီအညွတ် ကြီးကျယ်ခမ်းနားစွာ ပင့်ဆောင်ကိုးကွယ်ကြပါကြောင်း ၊ ရတနာပုံ ရွှေနန်းတော်အတွင်းမှ ရွှေကျီးမြင်မြတ်စွာ ဘုရားသို့ အဆိုပါ နန်းစဉ်ဆင်းတုတော်များ ပင့်ဆောင် စဉ်က အသုံးပြုခဲ့သော ဝေါတော်ကြီး နှစ်စင်းကို အများပြည်သူများလေ့လာနိုင်ရန် ဂေါပကအဖွဲ့မှ စနစ်တကျ ထိန်းသိမ်းထားပါ ကြောင်း။